AIS Chbarampov Campus

កាលពីនៅថ្ងៃអង្គារ ទី១៧ ខែមិថុនា ឆ្នាំ២០២៥ គណៈគ្រប់គ្រងសាលារៀន អន្តរទ្វីប អាមេរិកាំង សាខាច្បារអំពៅ បានរៀបចំទិវាកីឡាលើកទី៤នៅទីលាន បាល់ទាត់ បឹងព្រលឹត។ កម្មវិធីសម្រាប់ប្អូនៗសិស្សានុសិស្សវេនព្រឹកចាប់ផ្ដើមពីម៉ោង៨:០០នាទី ដល់១០:៣០នាទីព្រឹក និងវេនរសៀលចាប់ផ្ដើមពីម៉ោង២:០០នាទី ដល់៤:៣០នាទីរសៀល ដោយប្អូនៗសិស្សានុសិស្សទាំងអស់នឹងធ្វើលំហាត់ប្រាណលើចលនាបន្លាស់ទី និងការហ្វឹកហាត់កីឡាតម្រង់ទិសសម្រាប់កុមារតូចៗ លើវិញ្ញាសាអត្តពលកម្មដូចជា ការរត់ ការលោត ការផ្លោះ ជាដើម។

ទិវាកីឡានេះ ត្រូវបានរៀបចំឡើងដើម្បីផ្តល់ឱកាសឱ្យសិស្សានុសិស្សទទួលបាននូវបទពិសោធ និងអត្ថប្រយោជន៍ជាច្រើនបន្ថែមលើមេរៀនក្នុងថ្នាក់ដូចខាងក្រោម៖

១. ជំរុញការលូតលាស់កាយសម្បទាឱ្យបានកាន់តែមានភាពរឹងមាំ និងមានសុខភាពល្អ។

២. បង្កើនសមត្ថភាព ប្រាជ្ញា ស្មារតី និងទេពកោសល្យដល់ប្អូនៗ។

៣. បង្កើនភាពក្លាហាន និងបទពិសោធក្នុងការសហការ ការដឹកនាំ ភាពម្ចាស់ការ ឯករាជ្យភាព សាមគ្គីភាព ទំនាក់ទំនងក្រុម និងមជ្ឈដ្ឋានខាងក្រៅបានកាន់តែប្រសើរ។

៤. មានស្មារតីបម្រុងប្រយ័ត្នចំពោះការទុកដាក់ និងថែរក្សារបស់របរផ្ទាល់ខ្លួន។