AIS Chbarampov Campus

លោក គុណ ប៊ុន្ថា

ចាងហ្វាងរងក្រោមមត្តេយ្យ មត្តេយ្យ និងបឋមសិក្សា សាខាច្បារអំពៅ

ខ្ញុំបាទជាចាងហ្វាងរងក្រោមមត្តេយ្យ មត្តេយ្យ និងបឋមសិក្សា ពិតជាមានសេចក្តីសោមនស្សរីករាយយ៉ាងខ្លាំងសម្រាប់ការចូលរួមគាំទ្រ សហការពីសំណាក់លោក លោកស្រីដែលជាមាតា បិតា ឬអ្នកអាណាព្យាបាលដែលតែងតែពេញចិត្ត ហើយជឿជាក់លើសេវាកម្ម គុណភាព និងវិន័យរបស់សាលារៀនយើងខ្ញុំកន្លងមករហូតដល់បច្ចុប្បន្ន។ ទន្ទឹមនឹងការជឿជាក់របស់លោកអ្នក ក្រុមការងារយើងក៏រឹតតែមានកម្លាំងចិត្តបន្តព្យាយាម និងអភិវឌ្ឍ លើគ្រប់ផ្នែកនៃសាលារៀន។ AIS ត្រូវបានទទួលស្គាល់ដោយក្រសួងអប់រំ យុវជន និងកីឡា ព្រមជាមួយកម្មវិធីសិក្សាស្របតាមក្រសួងដាក់ជូនផងដែរ។ ជាសំខាន់ ការអប់រំត្រូវបានផ្ដល់ឱ្យចាប់តាំងពីថ្នាក់ក្រោម ព្រោះជាផ្នែកសំខាន់ដែលជាគ្រឹះដ៏រឹងមាំ ជាបំណិន ជាបទពិសោធន៍ និងជាទំនុកចិត្តរបស់សិស្ស សម្រាប់បន្តទៅថ្នាក់លើ ដោយលោកគ្រូ អ្នកគ្រូដែលមានបទពិសោធន៍សម្បូរបែប វិធីសាស្ត្របង្រៀនល្អៗ ម្ចាស់ការ និងយកចិត្តទុកដាក់ខ្ពស់ក្នុងការបណ្ដុះបណ្ដាលសិស្សានុសិស្ស។ មួយវិញទៀតសាលាបានរួមបញ្ចូលនូវមុខវិជ្ជាបន្ថែមពិសេសៗជាច្រើនទៀតដូចជា ភាសាបរទេស កុំព្យូទ័រ បំណិនជីវិត និងមុខវិជ្ជាជំនាញសម្បួរបែបផ្សេងៗទៀតរួមមាន គំនូរ របាំ តន្ត្រី គេហកិច្ច ហត្ថកម្ម អប់រំកាយ និងកីឡា។ ក្នុងនោះផងដែរគ្រប់បន្ទប់សិក្សានីមួយៗត្រូវបានបំពាក់ដោយគ្រឿងបរិក្ខារទំនើបៗ ថ្មីៗ សម្រាប់ផ្ដល់ជូនឱ្យប្អូនៗសិស្សានុសិស្សទទួលបាននូវផាសុកភាពក្នុងម៉ោងសិក្សា។

ជាទីបញ្ចប់សូមថ្លែងអំណរគុណដល់លោក លោកស្រីដែលតែងតែចូលរួម សហការគាំទ្រ និងផ្តល់ទំនុកចិត្តមកលើសាលារៀនយើងកន្លងមក ហើយក៏សង្ឃឹមដែរថាលោកអ្នកនៅតែបន្តសកម្មភាពសហការនេះជាបន្តបន្ទាប់ទៀត។ ខ្ញុំបាទសូមគោរពជូនពរដល់ លោក លោកស្រីដែលជាមាតាបិតា និងអ្នកអាណាព្យាបាលព្រមជាមួយប្អូនៗសិស្សានុសិស្សជាទីស្រឡាញ់ទាំងអស់ឱ្យជួបប្រទះតែ សុខសុវត្ថិភាព សំណាងល្អ សុខភាពល្អ និងជោគជ័យគ្រប់ភារកិច្ច។

ការអប់រំល្អ ផ្តល់ភាពបវរដល់អនាគត!